السلام عليكم ورحمه الله وبركاته..
النهارده جايبالكم وصفة إنما ايه حلوة اوى وهتعجبكم كلنا بنحبها كبار وصغار وتعتبر وجبه كامله ومغذية للاطفال والحالات الانيميا ..
بسكويت التمر :
المقادير :
كيلو دقيق (8كوب) _ (4) بيضات _ (2) كوب زبدة بدرجة حرارة المطبخ _ (نصف كوب ) زيت _ (2 ) كوب سكر مطحون ناعم _ ( نصف كوب ) نشا _ ( نصف كوب ) لبن بودر _ ( 2 ) معلقة صغيرة ممسوحة بيكنج بودر _ رشة ملح _ فانيليا
الطريقة :
_فى وعاء عميق ..حنضرب السكر مع الزبدة والزيت للحصول على خليط كريمى لونه فاتح
_حننزل بالبيض واحدة واحدة مع استمرار الضرب واضافة الفانيليا ..حتى يختفى البيض تماما ويعود الخليط للقوام الكريمى
_ فى وعاء آخر ...حنضيف كل المكونات الجافة ...البيكنج بودر والنشا ورشة الملح واللبن البودر والدقيق ( ماعدا كوب من الدقيق ..نتركه جانبا )
_نقلب المكونات الجافة كويس قوى
_ننزل بالخليط الكريمى على الخليط الجاف ونقلب ونجمع الخليطين من غير عجن نهائى ونشوف العجينة بتلم معانا ولا درجة التلزيق فيها لسه عالية ...حنضيف من كوب الدقيق المتبقى شوية شوية علشان العجينة تلم غالبا بنآخد الكوب كله
_نترك العجينة جانبا ترتاح شويه على مانحضر حشو التمر
تشكيل التمر ( العجوة ) :
_أنا بشترى العجوة بتكون قالب من العطار أو السوبر ماركت
_بنحتاج حوالى كيلو عجوة أو أقل شوية على حسب حتحبى الحشو واضح أو قليل
_بنقطع العجوة قطع بايدينا ...ونسخنها فى الميكرويف حوالى (40) ثانية...أو نرفعها على النار مع( معلقتين ماية ) يادوب تفك وتسخن شوية ....بعيدا عن النار نضيف للعجوة( معلقتين زبدة ومعلقة كبيرة قرقة ) ونعجنها كويس قوى للحصول على قوام لين
_نشكل العجوة رولات صغيرة على حسب السمك اللى تحبيه ونخليها على جنب جاهزة لوضعها فى البسكويت
طريقة التشكيل :
_العجينة ارتاحت ...حندهن الرخامة اللى حنشكل عليها زيت خفيف جدا
_حنآخد قطعة من العجين ونفردها على الرخامة بايدينا ( نبططها )
_بالسكينة نساوى العجين على شكل مستطيل ونتخلص من العجين الزيادة داير مايدور
_نضع( رول) العجوة فى منتصف العجين ونلم العجين على العجوة من الجانبين ..وغطى العجوة كويس قوى ...متخافيش من العجينة ..اتعاملى معاها كأنها (صلصال )
_اضغطى العجينة بالراحة على العجوة وبعدين لفيها روول للحصول على شكل ناعم للرول ( الصور حتوضح الخطوة دى )
_خلى بالك كده عندك رول ...هاتى (شوكة ) واضغطى بيها على الرول علشان (يتبطط ) شوية وفى نفس الوقت يآخد( رسمة )على الوش
_نقطع الرول الى قطع متساوية ...ونرص فى صينية وهكذا
_نشغل الفرن خمس دقايق على (170 ) وندخل الصينية على الشبكة فى النصف ...لغاية لما يلون من تحت بعد حوالى( 12 ) دقيقة ...نرفع الشبكة (درجة لفوق )علشان الوش كمان يآخد لون ( وخلى بالك منه بيحمر على طول )...مش بنحتاج نشغل الشواية
_يخرج من الفرن ...يبرد تماما واحتفظى بيه فى علبة محكمة الغلق
_الصوانى مش مدهونة لأن الوصفة فيها زبدة كفاية ان البسكويت مايلزقش
_مقدار السكر ممكن يبقى( كوب ونصف) مطحون ناعم
_نخلى بالنا دى عجينة بسكويت ..يعنى مافيش فيها عرق ...فطبيعى ان لما احط العجوة وآجى اقفل عليها بالعجين ..العجينة مش حتطلع معايا مرة واحدة زى عجينة الباتيه مثلا ...فى فرق طبعا
الف هنا ..
تعليقات
إرسال تعليق